قصائد الام

قصيدتي زاد بعيوني جمالــــــــها ** واخذت انقي بالمعاني جزالــــــها
واكتب معانيها من الشـوق والغلا ** لامي وانا اصغر شاعر من عيالـها

كتبتها في غربتي يوم رحـــــلتي ** لما طرالي في السفر ماطرالهــــا
امي وانا بوصف لها زود حبــــــها ** وان ماحكيت لها قصديي حكى لها

أمي لها بالجوف والقــــــلب منزلة ** مكــــانة ماكل محبوب نالهــــــــا
اقرب من ظلالي وانا وسط غربتي ** وانا تراي اقرب لها من ظلالــــها

ماشافت عيوني من الـناس غيرها ** ولا خلق رب الخلايق مثالــــــــــها
أغلى بشر في جملة النــاس كلهم ** وأكرم من ايدين المزون وهمالها

اتبع رضــــاها وارتجي زود قربها ** واللي طلبته من حياتي وصالـــها
الصدق مرساها والأشواق بحرها ** والعطف واحساس الغلا راس مالها

أهيم فيها وابتــــــــسم يوم قلبها ** يسأل وأنا قلبي يجاوب سؤالها
وان طلبتني شي فزيت منـــدفع ** أموت أنا وأحمل تعبها بدالـــها

اصبر على الدنيا والاحزان والتعب ** واحمل على متني فطاحل جبالها
أسهر وأعذب راحة القلب بالـشقا ** وأعيش أعاني بس يرتاح بالــــها

تربية ابوي اللي على الطيب اذكره ** اللي وهبني للحـــــياة ومجالها
نورلي دروبي وانا طـــــفل مبتدي ** حتى تركني واحد من رجالــــها

الوالدين اولى بالاحسان لاجلهم ** واولى بتكريم النفوس وعدالـها
اقولها وانا على الله متـــــــــــكل ** والله عليم بقديري واحتمــــالها

ياكلمة اغلى من الــــــناس كلهم ** ياشمس بقلبي بعيد زوالهـــــا
يافرحة تملي لي الكــون باكمله ** ياشجرة تكبر ويكبر ظلالهـــــــا

تضحك لي الدنـيا لي شفت زولها ** مثل السما تزهي بطلة هلالــــها
والبعد عنها ياهل الــــعرف مقدره ** لاشك ناري زايدة باشتعالــــها

ما أعيش ببلاد ولاهي بأرضــــها ** ولا أبي عيوني كان ماهي قبالها
أرض تدوس أمي بالأقدام رملها ** أموت فيها واندفن في رمالهـــا







اسألو دمي .. وسعادتي وهمي
اسألو التوفيق .. والكدر والضيق
اسألو الطيب في صفاتي .. والدعاء اللي في صلاتي
واسألو شهودي .. الدموع اللي في سجودي
اسألوهم .. واسألو دمي .. عن غلا أمي

عبدالرحمن بن مساعد



أمي ماهي أم كنز حنيه .. .. حنان هالكون كله منوخذ منها
محبة الام ليه تصير مخفيه .. .. محبة الام مدري ليه ندفنها

امي مهمه واهم من الاهميه .. .. ابفتخر في محبتها وابينها
كلي لها بجد من راسي لرجليه .. .. اعز من عزها واهين هاينها

لا قالت الآه كن شخص طعن فيه .. .. اجي من اقصاي فازع لاجل اطمنها
عذوربها بس طيبتها خياليه .. .. يازين عذروبها اللي مايشينها

قليل في حقها اللي قلت واشويه .. .. اكبر بواجد من اللي قلت انا عنها
دايم تردد : عسى الله يحفظك ليه .. .. تمشي وتدعي ياعساني ماخلا منها

خالد المريخي









قالت : أمـــــك ؟؟؟ فقلت :

واللــه لو تزعــل جموع الملايين .. .. حتـى ولو كـل البشـر عاتبـوني
حتـى ولو فيـهم وليف المـزايين .. .. ما رد في امـري ولــو خاصموني

حتى ولو ثارت جيوش وبراكيـن .. .. الـروم ويا الفـرس لو حاربوني
ما ينحـني راسي ولا ترمـش العين .. .. أصمد ولو في حبها عذبوني

لو يقسـموا جسـمي من الراس نصفين .. .. من هامتي ليما تباعد عيوني
وينشـق صـدري ويصبح القلب قلبــين .. .. يا بنت أنا في حـب (أمــي ) جـنوني

مـن لامــني في حبها ياـك الطين .. .. في حبهـا واللـه ما يحـرموني
يا بنت أنا والله لو اخسـر البيــن .. .. أنتي وكل الـناس ما يمنعـوني

الشاعر حمرعين









لو يجوز اسجد توطيت وخضعت .. .. جنة الرحمن تحت اقدامها
لو كنوز الارض عندي مااقتنعت .. .. ودي افديه وازيد اكرامها

من شروق الشمس صليت وركعت .. .. اترجى ربي يزيد ايامها
هاجسي دايم اذا رحت ورجعت .. .. كيف اعوض حبها واحلامها

في بهاها مانظرت ولا سمعت .. .. نور شمس ماتغيب اعلامها
لو وصفت النور منها ماستطعت .. .. خلقة الله لبسته احرامها

لو كتبت ولو رسمت ولو جمعت .. .. مانطق حرفي بدون اقلامها








امي نظر عيني دوا كل علـه .. .. من كفها الطاهر شربة الزلالي
وجها سموح وبسمته ماتمله .. .. شلال حبا ماترده الجــــــبالي

طيبه على طيبه وهي الطيب كله .. .. اصل وفصل والشان في الناس عالي
وفي الجد, سيف الحق دايم تسله .. .. ماهمه من كان لو كان خــــالي

يمه تحت امرك, من جـناحك يظله .. .. شخص رخص دنياه لعــيون غالي
وياسعد منهو كان حضنك محـلة .. .. يدفى ولو هبت هبوب الشـــمالي

ولا ياعرب ماقلت شعر اتـــــسله .. .. حبيت ابين للـــــــــملا راس مالي



وهذه أبيات شعرية متفرقة اخترتها قيلت في الأم :

ياليتني بينك وبين المضرة .. .. من غزة الشوكة إلا سكرة الموت
سعود بن بندر






ياكبر قلب الام مابه ضغينه .. .. عفت بقدره وسمحت من جحدها
محمد بن راشد



يمـّـه كبـرتي وصـرتي أحلـى من العــام
يـاحلـو ضحكــات التجـاعيـد بيـديــك



أنا يمه رهن طوعك ومن يسراك إلى يمناك
ولو ما طاوعت كفي أقص الكف لو تعصاك

أنا يمه إذا ضاقت بيالدنيا أجي وألقاك
أجي وأبكي على صدرك ولا أرتاح إلين ألقاك







من ياخذ الدمعة لعينه ويعطين .. .. بسمة أمل واعطيه في الناس همي
من خط لي في داخل القلب حرفين .. .. حرفين عز وذاك يفداه دمي
ماغيرها تاجي على حاجب العين .. .. أمي ولاأحد في العرب غير أمي



حب امي فرض واجب والمحبة طاهرة
من بعد ربي لها كل التذلل والخضوع

طفل ربتني وظلت بالليالي ساهرة
تحمل همومي وتمسح من على وجهي الدموع

قدرها عندي كبير فوق النجموم الظاهرة
وعشقى لها يبقى الأصل ولغيرها يبقى فروع



مهما كبرت ابقى بنظر قلبك صغير .. .. والقاك في قلبي كبيرة كبيرة
وانتي اذا جارت عليا المقادير .. .. أهلي وظلي والذرى والعشيرة
ياأجمل اسم صورته التعابير .. .. أمي حديث الحب في كل سيرة

اتمنى ان يعجبكم

شكرا

شكرا

شكرا لرد الحلو

العفو